Golfveðrið í Florida næstu daga

 

Jæja félagar!

Veðrið í Inverness í Florida næstu daga verður að mestu sólskin og hiti á bilinu 23 - 25 stig skv Weather.com. Það er gott til þess að vita svona rétt á meðan versti stormurinn gengur yfir landið. Margir spyrja okkur líka "Hvar er þetta svæði sem þið farið á í Florida" og alltaf reynir maður að lýsa því og gengur misvel. Hér er kort af svæðinu og mæli ég með að menn sýni konunum sínum hvar þetta er staðsett á Florida. Sjálfur fór ég síðasta sumar þarna með fjölskylduna og það var alveg meiriháttar. Stutt að keyra niður til Tampa til að fara í Busch Gardens með krakkana og einnig stutt inn til Orlando, því rúmlega klukkutíma rúntur í bíl í Bandaríkjunum er ekki langur bíltúr. Í Busch Gardens náði ég, 39 ára gamall, þeim áfanga að öskra á mömmu mína af hræðslu í einu tækinu þar sem maður fellur í frjálsu falli, lóðrétt niður á 70 mílna hraða í rússíbana með engu golfi úr 60 metra hæð og ég var fremstur eins og gaurarnir í myndbandinu hér að neðan! Skoðið tækið sjálf.