Ábending frá Lögreglu

 

                                                                              2. maí, 2007 Grafarvogsstöð Lögreglunnar á Höfuðborgarsvæðinu.      Langarima 21, kjallara Miðgarðs. S:444-1180 Golfarar og útivistarfólk.Ábending til varnar innbrotum í bifreiðar.           Það er vor í lofti og fólki fjölgar á útivistarsvæðum borgarinnar og í námunda hennar. Golfvellirnir opna nú hver af öðrum eftir vetrarlokanir og þangað flykkjast nú áhugasamir golfarar með bros á vör. Gleðin er við völd. Golfarar sem aðrir útivistarmenn fara gjarnan á bílum sínum á völlinn og skilja þá eftir á bifreiðastæðum á meðan þeir njóta þess að stunda áhugamálið, golf eða gönguferðir.  Brögð eru að því að vammlaust fólk hafi skilið við bifreiðar sínar á bifreiðastæðum við golfvellina og útivistarsvæðin með lausamunum og verðmætum á glámbekk sem hefur orðið til þess að óprúttið fólk hefur freistast til þess að brjótast inn í viðkomandi bifreiðar og stela þessum hlutum. Má ætla að í sumum tilvikum hafi hreinlega verið fylgst með fólki leggja bifreiðum sínum er það fer á golfvöllinn eða útivistarsvæðið og síðan látið til skarar skríða. Það er því höfuðatriði að skilja ekki við töskur, veski og aðra lausamuni í bifreiðum því það dregur verulega úr líkum á því að inn í þá verði brotist. Fólk situr ekki eingöngu uppi með að verðmætum er stolið heldur eru skemmdirnar á bifreiðunum jafnvel dýrari en það sem tekið er. Tökum höndum saman, lögregla og borgarar og afstýrum innbrotum í bifreiðar með því að vera á verði og freista ekki óprúttins fólks með því að skilja við vermæti á glámbekk! Kveðja, Einar Ásbjörnsson, aðalvarðstjóri,             Ásdís Haraldsdóttir, hverfislögreglumaður.

 

Athugasemdir

[Lolli (IP-tala skráð) 2.5.2007 kl. 21:50]

Þörf ábending þar sem einn af okkar félagsmönnum lenti í þessu fyrir tveimur árum og vara hliðarrúða í bílnum brotin á bílastæði fyrir utan golfklúbb á stór Kópavogssvæðinu.